思索良久，想想要點樣寫這間米二星懷石餐廳先夠客觀理性。最後決定用最平淡的直敍法，係不帶任何私人感情 （笑！）
話說兩年前曾經想試試這間網評不錯的懷石料理，貪佢可以網上預訂很方便。不過最後因為時間安排問題去了另外一間評分相若的吉泉 （另見BLOG文，註：現在吉泉的評分已經遠遠拋離建仁寺祗園丸山）。今次再訪京都，決定要試番這一間上次去不到的餐廳。網上預約仍是很順利，奇怪的事情開始隱約發生。。。 記憶中用網上預約後，通常餐廳會在光顧當天之前用email或者電話作提醒又或再確認。可是祗園丸山沒有任何動靜。。還是我自己親自打電話去確認預約。 OK － 小事一樁，不足掛齒。
出發前，手痕去tabelog再做下Research，咦。。。。 點解評分由4.X一下跌到3.83，排名京都八十八位。。。。 心裡涼了一小截。。。 不過還是同自己講，分數不代表一切嘅。況且臨急改也不知可以訂到什麼好餐廳，所以還是不變應萬變吧。
當晚下著大雨。。。從祗園四條步行去建仁寺祗園丸山行了十多分鐘（早知打的!) 去到已經濕漉漉，奇怪為什麼冇人響門口迎接。一般懷石料理門口都好低調，一定有專人響門口迎接，以免客人行過龍找不到。門口的大哥好像也怕了大雨，躲在店內沒有出來。Anyway，入去裡面把我們的濕遮收下也是常識吧。。。 當我把我手上濕漉漉的雨傘雙手遞上的時候，看門口的哥仔呆了半分才伸手來接，表情就像不解為什麼我要把濕遮遞給他一樣。。。 是我傻還是他傻了，此刻我真的有一刻動搖但也不深究喇。
我們被領到二樓一間頗大的廂房，我哋拎到一袋二袋，最想快快放下行裝。接待小姐叫我們把手袋放在角落地下。咁我哋啲大褸呢？『請也放在那裡！』 客人的大衣放在地下？？？ 如果我穿的是幾皮嘢的Fur也是丟在地下嗎 （當然我冇錢著Fur）？去串燒店都有衣架掛起件衫啦。。 這裡是高級食肆，收幾千一位的懷石料理店，Are you kidding me? （不好意思，開始激動了少少，ooops）
終於坐下來，送上熱茶毛巾是例牌啦。我因為連日失眠，棄茶要水。單單是我哋四個人每人要水要茶也弄錯，朋友想要茶就來了個水，說要茶，叫了總共三次才有。。。三次。。。 我不是在超繁忙的茶餐廳呢。都不好提茶喝完無人refill。。。 大部分時間我哋都係被獨留在這間廂房中，叫天不應叫地不聞，無人來招呼。。。 仲要冇開冷氣，焗得要死。上次我去嵐山吉兆，他們好像裝了天眼一樣，茶一喝完就有人自動入嚟更換，從不需要親自出口。是我們被其他懷石料理店寵壞了嗎？
先看看今天的餐牌，我們預訂的是31,050日圓一位的季節料理。
呆坐了半個鐘之後，終於上第一道菜。無人講解怎樣吃，我哋又『被』冷落在空房自生自滅。 石頭上是松茸和和牛，原來係要盡快食，我的放太久乾左。。。 左下角的蝦我以為是刺身一口吃掉。。。
當覺得都麻麻地好食嘅時候，老闆娘斯斯然入来話幫我哋倒酒，然後先告訴我哋要快啲吃完啲松茸（已經放咗好耐啦喎），仲話啲蝦要放到石頭上燒再滴檸檬汁。。 Hello。。。我已經當刺身食左喇喎，點解唔可以早啲響呢？一刻前，係我最需要老闆娘你嘅時候，你在何方呢？
就係咁，第一道菜就監生白白犧牲掉。。。 （看到我眼眶的兩滴淚珠嗎？）
以下省略每道菜之間的呆等時間。。。 想像烏鴉在天空飛過。。。 吖。。吖。。丫。。。的叫，點解房裡邊唔裝電視呢？你懂的。
真魚生來了，OK。
跟住是松茸湯，裡面還有鰻魚。哈，這個松茸湯不錯，清淡而甜，合我口味。
睇嚟今天的主題是松茸，蟹同埋柿子。咪住，乜蟹同柿子唔係唔可以一齊食架咩？係日本人唔識，定係佢哋真心認為寒涼鬥寒涼，所謂以寒制寒，以毒攻毒。。。我都唔係好知我自己講乜啦已經。。 仲要佢哋係唔跟Menu嘅次序上菜，即係亂Q咁嚟，又唔解釋邊道菜打邊度菜，務求令你唔知自己食緊乜為止。
O嘴小插曲：圖中我的柿子都好靚仔下，不過有人歡喜有人愁，你睇下我個friend的爛柿。。。 算在下見識淺薄，懷石料理講求一絲不苟，用嘅每一個餐具，擺位都精挑細選，我要求唔高，都唔會諗到整個爛柿嚟，你估而家Halloween咩。可憐我個朋友為了這個Halloween特別版，唔開心咗成晚，心諗唔通連祗園丸山都唔鍾意佢？
寒完之後係時候要補一補身，嚟個十全大補湯，有水魚，水魚春，水魚腳趾，水魚腎（駛唔駛玩到咁大先？），唔講以為去咗深圳食野味，真係唔知日本人好呢家嘢。。。 呢個時候，身邊另一個朋友已經食到High左，猛話好好食。難道剛才爛柿的屈辱就此忘記？
當我哋因為補湯太熱入唔到口嘅時候，成晚慢吞吞嘅上菜節奏就喺此刻來個180度大轉變，突然間電光火石之際拿拿林上下一道菜。記住我哋係未飲補湯的呀。有一個阿哥手捧這籮蟹，show一show就捧出去露台玩。好彩我手快俾相機先吃啫。
說時遲那時快，已經燒好隻蟹腳。
都未食得切，再來蟹鉗。真係好似打仗咁混亂，都唔知食得邊樣，四個人只有兩個人食到蟹鉗（唔好問我點解！）爛柿朋友繼續因為吃不到蟹鉗而情緒跌落谷底。。 Hmmmm。。。 谷氣還谷氣，這個真真真是全晚的亮點。嗰pat綠色的蟹膏湯，再把蟹鉗肉刮出來，撈埋個蟹膏湯嚟食。。。 嘩，好食到呢。。。 真係好好好好味。個燒飯糰都好好食，我要趕住響佢凍之前快快吔咗佢。
好，混亂過後，終於搞掂隻蟹同個十全大補湯嘅時候，又九秒九上飯。。
最後是甜品。
這個先慢後快的上菜安排果真在懷石中少見。主廚亦即係老闆丸山先生入嚟派片，當佢匆匆忙忙想閃人嘅時候，我就用我不靈光的日文投訴爛柿事件，當我以為佢會好驚訝，點知佢一臉不屑，只是輕輕說了句對不起（大概是OK，Noted的意思），然後一副睬你都傻的態度繼續想極速鬆人。大師，你無心同客人交流，就唔好入嚟，同你投訴你俾番少少誠意都好吖。這個不是小事一樁，係一間高級餐廳（先唔好講日本餐廳啦）不能犯的低級錯誤。更何況阿生，你開的是事事講究的懷石料理店呀！如果唔係我的日文差，響呢個moment我一早就已經破口大罵。。講廣東話我又擔心你唔識聽喎，真係大有日文到用時方恨少的感慨。丸山先生，多謝你，係你俾到我要學好日文嘅原動力，他朝我学有所成，我一定會親自打電話再同你投訴。不過親自再光顧就應該免啦，就算個蟹膏湯點好食都係咁話。
O嘴停不了，到埋單嘅時候都仲要O你一O。埋單一計，點解每人要俾多一千日圓嘅，老闆娘諗都唔諗就話係飲品，我哋話我哋都無額外叫飲品，侍應都確認話冇，咁老闆娘先話個蟹膏湯要加錢。。 從來冇講過要加錢，真的同打死狗講價無分別。
食已至此，無話可說。此刻好平靜，真的不帶任何感情。
建仁寺 祇園 丸山 （けんにんじ ぎおん まるやま）（Tabelog: 3.83 as of 1/12/15)
京都府京都市東山区小松町566-15
075-561-9990
留言列表
