京都旅館有所謂御三家（即俵屋，佟屋同埋炭屋），唔好話畀人聽你未聽過呀哈哈，會俾人笑㗎！不過未住過就好正常，出名嘅嘢通常都未必一定要去試嘅下嘛。之但係為咗深入體驗京都文化，我決定帶備足夠彈藥深入虎穴去探個虛實，仲要一揀就揀三家之首兼日本旅館之最兼最棘手嘅俵屋。點解我話佢棘手呢？因為佢係不設網上預約，只有打電話，confirmation都只能用Fax因為佢哋係冇Email嘅（究竟咩年代呢？）全間旅館只有十八間房，唔好問我要幾耐之前預約，我諗好睇你同佢究竟有冇緣分囉，有時係冇得強求嘅 （我最近book得日本餐廳多，這個是我個人的深刻體會）但是只要他們有空房，只需留下姓名和電話便可，什麼訂金呀信用卡都不要，全憑一個信字。但是，我認為更重要的原因是他們覺得你想入住多過他們想你入住，所以認為客人一定會來。
一去到旅館門口，打從落的士果一刻就開始變做了上賓（雖然我哋著到爛身爛勢！）幾個著住和服的服務員從四方八面走出來爭住幫你攞行李（係連手上拎住個啲都拎埋！）未入到門口就撞到名人（上海灘老細），嘩，同有錢人住埋同一間旅館真係與有榮焉（就好似去福臨門響大劉隔離開餐一樣，哈哈，純粹講下笑啫！）今次我哋嘅房間係14號房，『楓』，呢度間間房都係唔一樣嘅，所以想試勻哂十八間房要來十八次咁多，仲要係預約到喎（聽講有幾間房係特別搶手嘅，不過應該唔係我哋住嗰間）。不過到你真係住勻十八間房嘅時候，之前住過的又翻新了，又得重新再住一次。。。
Service Menu裡面有手繪嘅房間間隔圖。
先嚟比對一下這個觀景小客廳的實景，睇下佢畫得似唔似。響呢度望住窗外嘅景色，一邊歎茶，仲好貼心咁放埋毛氈比你保暖，真係不得不佩服日本人的細心。
我最喜歡俵屋的小物，所有嘢都有佢哋自家嘅Logo，仲要係樣樣都是一絲不苟的高品質，至愛這對軟綿綿絨毛拖鞋。
掛在墻上的香包。
房間的客廳部分。電視機平時係收藏起來，客人不看是不會拿出來。
再參觀埋浴室。可惜這裡不是溫泉旅館所以係冇溫泉浸嘅，不過佢哋有特色檜木浴槽。
浴室仲有獨立嘅淋浴間。有冇留意支溫度計呀？係用嚟量度浴池嘅水溫㗎。淋浴間外邊仲有獨立吹頭更衣嘅地方，香港人實話使唔使呀！
最好笑係我哋一入到房間，就問和服女士可唔可以開冷氣（因為日本冬天好鍾意開暖氣，房間變得好焗）。在十一月要開冷氣，和服女士心諗這兩個來自香港嘅女子一定是傻的馬。不過佢雖然有少少為難，但係還是特登開了冷氣俾我哋。又足證這裏服務至上嘅態度，並無因為佢哋嘅超強名氣而有半點怠慢客人，確實抵讚！
食飯之前出去參觀一下旅館。奇怪係撞唔倒其他客人，就好似我哋包哂成間旅館一樣。但係明明是有其他客人的呀，因為我哋見到服務員在每間房出出入入。Anyway，我哋去了這裡最出名嘅圖書室。聽講係老板娘外籍老公以前嘅工作室嚟架，嗰排書櫃，嗰張designer chair，好有似曾相識嘅感覺（好似我屋企個reading corner呀！）
我都睇下書，扮下文化人先。
來到晚餐時間啦！當然是室內吃啦。不過有少少失望，可能因為差不多係全魚宴，加上之前去咗食嵐山吉兆食尖咗條脷。
食完飯，又會有專人入嚟幫你整理被鋪。件睡衣好舒服，仲要兩件嘅帶係唔同色費事你撈亂，仲有聽講床單係用真絲的。榻榻米可以整到舒服過彈弓床果陣犀利！仲有床頭仲要整盞床頭燈，絕呀！呢度每一個細節位，真係細緻都令人感動（如果唔係毛管戙！）
第二朝食完早餐（又係魚，btw），就要告別帝王式享受了。當然送行時候全體人員直角九十度鞠躬恭送到的士遠離視線範圍這些一定唔少得。。
御三家果真笨唔係浪得虛名，單單係佢哋嘅服務就真係超六星級，唔怪得人哋話係日本旅館之最，喺度住一晚聽講係好多日本人畢生嘅夢想。唯獨是兩餐有點兒失望 （但係佢哋嘅餐飲supposed都係高排名嘅）。不過下次有機會還是想見識見識一下另外兩家。
俵屋 （Tawara-ya)
中京区麩屋町御池下ル
０７５－２１１－５５６６
留言列表
