寫過吉泉，寫過祇園丸山，何解遲遲沒有寫京都嵐山吉兆呢。。。 連我自己都百思不得其解，何況這餐嵐山吉兆，真係學阿蘇話齋，可以講足一世的一餐，唔寫當真係對唔住自己又對唔住間餐廳呀！
這餐究竟有乜嘢咁特別可以講足一世咁巴閉呢？首先，貴，唔洗講嘢，係超乎想像咁喇脷，嵐山吉兆最平的套餐是每人36,750日圓，最貴是六萬日圓一位。即是話，入得嵐山吉兆的門口，至少要擺低港紙二千五大圓，仲要係至平果隻啦 (呢個價，仲要係日圓貶值之後的價錢）。人家的最平，卻是我一生人食過最貴嘅一餐來，嗚嗚。。 當然我唔係發咗達，但係為咗一生人點都要豪一次，何況唔食過點知點解要咁貴先？人一世物一世，點都要試下嘅係咪？為咗美食，我係絕對義無反顧豁出去食咗先算！
翻查紀錄，我係出發之前六個月的預訂，只要到他們的網頁填表格，很快他們就會用電郵回覆。雖然我唔知要幾耐之前預約先會有位，但係如果撞正櫻花或者賞楓季節就最好早D訂了。聽講旺季嘅時候係好難預約到地下有景觀的個室。還有值得一提，嵐山吉兆係有好多分店，有啲仲響火車站樓上，價錢相比本店相宜得多。之但係米芝蓮三粒星嘅始終係本店，tabelog也以本店評分最高。
嵐山吉兆很易找，過了渡月橋沿著嗰條大河桂川向上游行8分鐘左右便到。這裡用餐的個室非常之大。我哋嘅個室係響地下，可以見到十一月頭樹葉還是一片翠綠，但係過多幾個星期，坐享同一個房間就可以望到一片火紅嘅楓葉，單係諗下已經覺得超正，所以一早俾人Book哂係絕對可以理解嘅。
首先係先付。試咗幾次懷石料理，發覺佢哋好鍾意先付用屋仔形狀的器皿。不過吉兆冇用傳統嘅托盤，改用藤籮好有心思呀！你睇成個擺設得好似一件藝術品咁樣，靚到真係唔係好捨得食落去。
跟住係清湯 （Owan）（哈哈，之前響吉泉上過懷石101學到D嘢呢！）當然個湯好好飲不在講，我最欣賞嘅反而係個碗，開頭見個蓋底嘅雕花已經覺得好靚，點知飲完湯食完魚肉同松茸之後個碗底D金雕花先叫人嘩嘩聲。漆器已經係出名貴，仲要有埋金箔雕花，雕工仲咁仔細，我真係好想知道這隻碗究竟幾多銀。。 唔怪得收我哋咁鬼貴啦！
好啦，按懷石次序，應該到向付け（Mukozuke），即係應節嘅刺身。這天食嘅有兩種，不過我唔係好知這個係乜魚，但係好好食，還有那片小金箔好閃呢。第二個是魷魚刺身，特登影大特寫等大家睇下師傅嘅刀功，一瓣瓣的真係幼細到少D功力都做唔到呀。點芝麻食又係另一種風味。
然後是蒸物，是日是蒸蛋。
哈，食食下，無啦啦侍應捧咗盤出哂煙嘅盆栽入嚟。乜事呢？
原來係燒魚，以葉包裹，令魚肉滲著淡淡葉香，嘩，而家諗返起都流晒口水。
到蒸野菜了。
然後是主食。燒雞飯，正！
生果好豐盛的一大盤呀。上碟後仲要加埋Custard醬，其實已經好甜㗎喇喎。
仲未完架。懷石最尾要以正宗抹茶作結的。仲要配隻小白兔送茶，好精緻呀。
最後再上一個普通茶。這餐就是這樣，以幸福的心情摸著個脹晒嘅肚腩作結。
雖然懷石料理嘅流程度度都大同小異，但係食過嵐山吉兆先知咩叫一分錢一分貨，食物嘅質素烹調以至用嘅器皿，還有服務員無微不至嘅貼身服務，不一樣就是不一樣，我們真係有一種響這短短三個鐘被侍為一等上賓嘅感覺。如果你問我值唔值得俾咁多錢去食這一餐，如果一生人只可以食一餐懷石，咁樣我覺得絕對值 （唔好貪平食其他啦！）。但係，會唔會再食第二次？我就寧願讓這美味的體驗永遠留在回憶裡 ～
京都 吉兆 嵐山本店 （きっちょう） （Tabelog 4.27 as of Feb 11 2015, 京都排名第十二位）
京都府京都市右京区嵯峨天龍寺芒ノ馬場町58
075-881-1101
留言列表
