一直久仰澳門新葡京8餐廳的大名，可是每次去澳門都是有點即興來不及預約，所以久久未嘗一試。今次一早個多月前就通過網上預約，抱著萬分期待，點知又碰巧屋企愛貓病倒了。。。 真是天有不測之風雲。。。 經過一輪內心掙扎，最後一分鐘決定即日來回過大海只係為了食這一餐8。。。可見美食同貓貓響我心目中有著難以取捨的相同比重！
8餐廳位於新葡京酒店的二樓。過了Reception之後，要通過一條類似時光隧道的物體先可以進入大廳，唔講真係以為去咗Club，最特別是地下有鯉魚的動畫，踩響上面，魚會響腳底游下游下都幾盞鬼。我哋坐的枱係半圓形的梳化位外加兩張櫈，一行五個人坐得非常舒服鬆動，牆上滿是金魚的裝飾。好明顯這裏所有嘢都好講意頭，但又不得不佩服他們響貫徹金魚主題這方面的心思。
先上是奉送的頭盤，個凍鮑魚好好味，配埋下面嘅柚子啫喱非常醒胃。隔離個脆片肉粒都好正！作為餐前小食水準絕對係超班！貴為現時澳門唯一獲三粒米芝蓮星星的中菜廳，果真不負所望呀下！
由於今次我哋食lunchi，所以主打試這裡嘅點心。首先上嘅係本人覺得最好食嘅煎叉燒包。呢度嘅叉燒包，係分煎同蒸。由於煎嘅實在太好食，我哋encore再叫多個蒸嚟試下。
賣相真係cutie到無話可說，嗰啲箭豬毛一條條做得好仔細，仲要唔係得個樣，裡面個叉燒餡真係好好食，完全食唔到肥肉，又有濃濃嘅叉燒味。實驗證明，煎嘅係好食過蒸嘅，個底煎到啱啱好金黃脆脆，但係又一啲都唔油淋淋。一句到尾，唔駛多講一定必試這個煎箭豬叉燒包。
跟住呢個係藍天使海蝦餃。淨係果幾塊金箔就令成個蝦餃矜貴晒哈哈！
幾乎人人嚟這裡必叫嘅手袋酥。個皮做得好鬆化一啲都唔硬幾好。
金魚餃也是熱門點心之一啦！肥嘟嘟好打意呀！我阿媽仲將條金魚正中劏開一半嚟食，好殘忍呀！我寧願成條放入口啦。。。
金網叉燒酥，比較失望，個酥皮做得有點硬。
跟住這個也是心水推介，棗蓉馬拉糕，鬆軟到不得了，加了棗蓉又出奇地夾喎。你睇上面仲要加番D金魚鱗圖案，洗唔洗細心到咁呀。。。
除了點心，我哋仲試咗佢哋兩個招牌菜，BB豬焗飯同埋手撕雞柚子沙律，全是水準以上之作。
個BB豬皮脆到難以形容，只可惜齊腰斬人家只BB豬真係有點於心不忍。。。所以下次要叫又唔想殘忍可以叫全隻。。。 （講笑啦！)
好啦飽飽啦，又到甜品時間。揀了招牌金魚鴛鴦凍，係呀又係金魚呀。。招牌呀嘛。
最後還有奉送的熱奶茶同埋一口甜品。個奶茶呢，真係甜到無朋友。。。
總結，絕對值得一來再來嘅餐廳。淨係個餐牌裡面還未試嘅菜式，樣樣都睇到流晒口水。而且服務好到無可挑剔。個人覺得，比香港的龍景軒還要好食。特登過大海淨係為咗食佢，都值。不過要嚟最好多啲人一齊，飲茶嘅嘢，要多D人先可以試多幾樣家嘛係咪先？
8 Macau
http://www.grandlisboahotel.com/dining-zh_hk
Tel：(853) 8803 7788
留言列表
