娜娜林部落格

先來賣花讚花香的時間，介紹一下鳥喜有幾巴閉先：

（1）2016年東京榮獲米芝蓮一星的串燒店有五間，鳥喜是其中一間

http://gm.gnavi.co.jp/restaurant/list/tokyo/all_area/all_small_area/yakitori/1star/

（2）可能你會話米芝蓮係鬼佬嚟，未必懂得欣賞日本人口味，咁不妨睇下tabelog 2016 日本五十最佳餐廳，上榜嘅得番鳥喜一間，排第十九位。

http://tabelog.com/en/award/restaurant

不過呢啲都係虛名嚟，當然要親身食過先知龍定鳳。鳥喜位於錦糸町，真係唔係專登去食都唔會去呢個地方。。。 其實又唔係真係好遠，響淺草Sky Tree附近（雖則話附近，步行到要30分鐘）。晚上這裡做兩輪，6點半一輪，8點半第二輪，可能係咁，鳥喜相對比較易訂位。我哋幫襯那晚除了我哋，差唔多全部都是本地人。

門口當然要留個影先。

晚餐時間只可選擇Set，另可在menu追加。

餐牌上邊有點點就是set menu包的。好了，知道日本人燒雞真係將隻雞煎皮拆骨，差唔多係你諗得出嘅部份都攞嚟食。。。萬一你唔食內臟，真係會俾佢嚇一嚇。

先上嘅係佢哋嘅名物之一，White Breast with Wasabi (仲要標明Almost Raw）。。  直譯差不多生雞肉。

真係冇呃人，真係生到無朋友。有一刻我真係有D猶疑，究竟可唔可以擺入口。。  平時真係冇想像過放舊生雞肉入口架喎。。。  反正我不入地獄誰入地獄，死就死啦。。  哈，竟然又唔係想像中咁奇怪，雞刺身。。 原來同魚生一樣滑滑地幾得意架喎，個feel好似火炙吞拿刺身咁樣。

跟住係Chicken Thigh，雞腿，今次係熟嘅。但係我朋友話佢食個舊中間有啲生。

轉一轉口味食燒野菜先。Welsh Onion。小洋蔥。好清甜好好味。代替咗唔當造嘅銀杏。

開始嚟D重口味嘢啦，雞肝（仲要標明係生區區！）。好似豬潤咁嘅質地，鍾意食嘅會覺得好好食。我本人覺得好食喎！

燒茄子同埋燒雞肉丸，都係水準之作。

燒鵪春蛋同雞胗。不過鵪春蛋冇我上次響名古屋大銀杏食嘅流心鵪春蛋做得咁出色，普通咗少少。

燒筍。正！三四月啱啱係筍當造嘅季節，日本人最擅長就係不時不食。

哎喲，雞皮。。。 平時食雞都唔食皮架喎，點解日本人會鍾意將雞皮燒到脆卜卜嚟食。。唔係咁健康囉。。。不過死就死啦！擺落口唔理咁多啦。

跟住戲肉嚟，我最鍾意食嘅燒雞翼。佢哋仲教我哋點樣一嘢拆骨，可惜我失敗咗，仲要辣親隻手指。。。 呢個堅好食，加上同平時啲燒雞翼嘅形狀有啲唔同，好特別。

燒冬菇

套餐就係以上嘅咁多款，睇下食完之後啲竹籤幾壯觀

我哋除咗套餐之外，仲追加咗個鳥喜沙律同埋雞心。

其實我哋冇食到鳥喜最重口味的串燒，就係一，雞籮柚，二，Chicken with egg。。。 唔係雞加雞蛋。。。係雞痴住隻蛋。。。 諗下雞邊樹會有咁嘅地方。。。 真係重口味到呢。。。 我哋當晚見到有兩父女點了。。。 個小女孩望住支嘢，都唔知食唔食好咁嘅樣好好笑！

好啦，飽晒啦！最後以幸福的心靈雞湯作結。

其實，日本人選得係日本50大餐廳，當然係實至名歸。都唔使我多加評論。尤其是佢哋能夠將一隻雞解剖到咁仔細，連我哋平時唔會食嘅部位都拎嚟燒就已經不得不寫個服字。更令人敬佩嘅係，成晚只係大師傅（老闆）一個人燒晒所有串燒，火候較到啱啱好，真係佩服佩服。鳥喜，絕對值得串燒愛好者一試，一定唔會令你失望。

とり喜 （とりき）
東京都墨田区錦糸1-8-13 小坂ビル1階

03-3622-6202