上回介紹咗Narisawa嘅魔法麵包，今次繼續寫其他菜式，碟碟都靚到好似藝術品一樣，唔講真係爭啲以為自己去咗美術館。
未上菜之前，通常侍應都會問你需唔需要Aperitif，估唔到佢哋仲貼心地提供無酒精嘅cocktail。除咗wine pairing，仲有tea pairing。。。 好厲害，不過太貴冇幫襯到。
我哋點咗應節嘅櫻花特飲。單係賣相已經一百分。
這次食嘅係2016 春天系列，以『里山』（Satoyama）為主題。乜嘢係里山呢？原來Wiki都有介紹架喎，即係郊外偏遠山區嘅可耕種農地（差唔多係咁意思啦哈哈）。原來廚師覺得日本70%土地都係森林，而且四面環海。日本人嘅生活都係同森林海洋密不可分，這樣天然嘅環境稱之為里山。有山有海，所以食材全都係來自這些日本嘅山地同海洋。Anyway，頭盤先上Baby Sweet Fish and Sakura。
啲櫻花醬整得好靚，加埋個透明碟襯托到啲魚仲好似仲響個水池度游嚟游去咁，成幅立體畫一樣，爭啲唔捨得食落肚。雖然話係Sweet Fish，但係個頭位置係有少少苦味架。
之後係來自佐賀嘅Soft Shelled Turtle，軟殼蟹就食得多，軟殼龜都係第一次食。不過味道唔係好食得出係龜，可能炸成咁，其實話係乜都差唔多味。
還有不在menu上面嘅餐前小食。估佢唔到，果兩舊黑過古天樂嘅原來係洋蔥嚟。
跟住呢個真係又係另一個藝術品，Satoyama Scenery and Essence of the Forest。直情整埋出黎比你睇咩叫『里山』，好似一個像真度極高嘅模型呀。
最好笑係果杯裝喺小木桶嘅Essence of the forest，初頭飲落以為係普通清水，淡而無味。不過，既然講到係森林精華，嗒嗒下又真係有少少森林味。。。哪，呢啲嘢真係要加啲創作力量同幻想，就會嚇你一跳架啦。不過隔離果渣草同柴枝全部都係食得架。
下一味菜，名有啲長，兵庫縣神戶牛，靜岡縣斷溝龍蝦，加埋沖繩嘅海蛇。wow，究竟係乜東東？好得意呀，原來係講緊放響蝦片上面嘅一口壽司材料。海蛇就做咗清湯。
Next，兵庫縣明石市嘅鯛魚同埋來自石川縣嘅牡丹蝦整嘅sashimi。Yum Yum！
三重縣嘅大蜆煮出來嘅濃湯。豆豆加番茄加蜆肉嘅精華，好濃好鮮味，正！
繼續海鮮，靜岡縣龍蝦仔配以石川縣嘅蜂斗菜（butterbur bud）同東京嘅獨活（Udo）。
山口縣方頭魚加石川縣馬毛蟹。。 不過實不相瞞，成餐最難食係呢個。唔知點解有啲腥味，舊魚完全無味，同一般炸雪魚無分別。。。。 睇番都有啲唔開胃哈哈。
衰嘢唔好提，介紹番啲好嘢先，『Luxury Essence 2007』神奈川縣鮑魚。雖然係鮑魚做嘅清湯，但係今次唔似Essence of the Forest啦，話明Luxury嘛，係鮑魚有鮑魚味架。
嘩，再來山口縣嘅雞泡魚同白子。唔駛我再多講白子呢樣日本名貴食材。。。不過有機會嘅話，我唔希望再食。。。。
好啦好啦，到主菜啦，係京都鴨。係用Slow cook嘅煮法整嘅，我覺得整到幾唔錯。
齋睇眼睛都有啲飽，係時候上甜品啦。呢個甜品真係值得真心讚，『Tsubaki and Koji』。Koji，日文叫麴菌，常被用作發酵大豆嚟製造醬油，味噌等，亦會用來造酒。姑勿論呢啲咁學術性嘅介紹，簡單來講，我覺得用咁樣嘅食材去做甜品本身已經好有原創性，完全冇出面平常甜品用嘅元素。甜味來自純天然嘅麴菌，仲帶有濃濃嘅酒香。好厲害！
跟住仲有甜品二號，福岡抹茶。雖然冇之前個甜品咁特別，但係都好好食。綠茶配mochi紅豆，從來都好難唔好食哈哈。
Narisawa嘅故事仲未完。。。 食完呢個咁清新脫俗嘅甜品之後，還有好戲在後頭。由於我哋食得快（話快都食咗兩粒鐘），所以我哋係第一個見到侍應推呢架咁森林feel嘅甜品車出嚟，真係嚇到個心肝仔都離一離。送茶嘅petit four洗唔洗咁誇先。。。這個一定係我食過咁多間餐廳最靚嘅Petit Four甜品車仔。連這個小小環節都花咁多心思，而且每件都整得非常精緻，絕不馬虎，真係好佩服廚師對食物精益求精，力求完美嘅堅持。
雖然飽，但係我都差唔多每樣都點咗。有啲後悔冇樣樣都要晒。。。係咪好靚呢。值得一提，大家有冇覺得前面嗰粒小草有啲熟口熟面呢，佢就係小草牛油個細佬，不過佢唔係牛油係朱古力嚟，好cutie呀！
配埋杯herb tea真係一絕。
平心而論，單係為咗Narisawa個魔法麵包同埋個Petit Four，我覺得點都值得嚟食一次。但係會唔會再嚟呢？咁啱當日坐響我哋隔離係某位香港前廣播處長，我就以佢講嘅一句說話來（先旨聲明，唔係偷聽，係佢講得真係好大聲）為Narisawa這一餐作結 － 『咁貴嘅一餐，唔係有人請我唔會再嚟囉！』哈哈，雖然咁講有啲唔係幾好意思，但係我確實有啲認同 ：－）有啲餐廳，食一次留作一世嘅回憶就好足夠架啦（尤其荷包唔係真係咁豐厚嘅時候）！
Narisawa
東京都港区南青山2-6-15
03-5785-0799
http://www.narisawa-yoshihiro.com/
（網頁英文版有專為外國人網上預訂服務，每個月第一個工作日開始可以預約下一個月份）
留言列表
