徘徊在『古怪』與『打意』之間－ Disfrutar@Barcelona－娜娜林部落格

這次歐遊，有幸品嚐了不少美食！原本打算由最好食的一餐開始說起，可是揮筆之際，卻第一個想起了Barcelona的Disfrutar。並不是它美味過人，而是它菜式之『奇特』確實令人一試難忘。。。

Disfrutar開業不過短短數月，但是據講兩個主廚是從El Bulli出來，網上說很快這間餐廳就會變成Barcelona最火熱的餐廳，在一位難求之前務必要一試。加上如果你齋看他們菜式的相片，真是非常之吸引。。。

於是乎就是這樣，我們寧捨Tickets選了Disfrutar作為我們Barcelona的最後晚餐，抱著滿心期待歡歡喜喜的來到這間聞名不如一吃的餐廳。

根據當晚的觀察所得，我肯肯定Disfrutar很受歡迎，無疑是餐廳界的明日之星。全場座無虛席，而且光顧的都不是遊客，而是大部分都是當地人，還要是衣著入時的上等人：－O

環境OK，食客OK，始終食物才是主角嘛！這裡只提供兩個menu，就是六十八歐元的Menu Disfrutar和九十八歐元的Menu Festival。一場來到，當然冇執輸選了Festival！好，驚嚇之旅開始一浪接一浪咁湧埋嚟。。大家。。。準備好未？先旨聲明，全個menu總共有二十五道菜的呀，比起我在Mandarin Krug Room吃的還要多。。。

第一道菜－ Melon Caipirinha。單看賣相，好打意！侍應說，旁邊那兩片『蜜瓜』是用那個長鉗夾住嚟食的。OK －奇妙的體驗就由細味這杯茶不是茶，湯不似湯的東西開始。。一飲下去，乜傢伙嚟架呢。。請容許我見識淺薄，挖空腦袋想到最貼切的來形容這杯嘢的就是。。。洗潔精水。。。加埋嗰D泡泡，真係好神似。。。呀原來洗碗D泡泡是咁嘅味嘅。可能要食埋個蜜瓜先可以起到化學作用，喂？淡茂茂無味嘅，我開始懷疑究竟嗰兩舊嘢係咪蜜瓜嚟。。。會唔會其實係蜜瓜味嘅番梘嚟。。。

Next，The Beet that goes out of Land。這是Magic。。一瞬間，上菜的時候是見唔到嗰兩粒粉紅波波，只有一碗黑芝麻。點知侍應搖下搖下，兩粒粉紅波波就響黑芝麻中間升咗上嚟。後來我哋隔離張檯嗰D客人話冇拍低這個magic moment，居然叫侍應入去裝返D黑芝麻出嚟再表演過。。。早知我哋都咁同侍應講啦哈哈！講返舊波波。。叫得Beet我以為同紅菜頭一定有啲關聯。。可惜在下條脷唔爭氣，真係Beet唔出。。都唔知係乜嚟。。。唔難食不過當你食緊D唔知係乜嘢嘅嘢落肚嘅時侯，感覺總是怪怪的。。。

Crispy bow with cured Iberian Bacon。Iberican我識－西班牙好出名嗰D Ham丫嘛。。不過Ham見唔到，見到隻炸蜘蛛。。邊鬼到有Ham先？明明係冇味蝦片。。又似我哋用嚟墊响D炸嘢底嗰D米通。。

跟住呢兩粒先騎呢。。 Caramel-coated hazelnuts with elderberry。。。同樣個Description裡面寫嘅全部食唔出，似兩粒糖蓮子，死啦，係咪我條脷有事呢。。。

Tomato "polvoron" and Arbequina Caviaroli - OK，起碼我認得嗰幾粒應該係魚子。。下面嗰個厚切山楂餅，你話係番茄就番茄啦。。我都話食唔出囉。。

Transparent pesto ravioli - 夾響松果上面嗰兩個膠袋仔就係『透明』雲吞。。要浸響前面嗰兜漿糊裡面然後先食架。。。again。。好『打意』囉。。

Disfrutar de la aceituna - 呢個應該係佢哋嘅Signature Dish嚟，之前最多都係食落口食唔到Description講嘅味道。。由而家開始，驚嚇位要升到另一個層次。。就係眼見嘅唔等於你諗嘅。。。大家。。。呢兩兜笨唔係橄欖。。係似橄欖嘅物體，而裡面亦都有橄欖味。。好地地點解要呢裝假狗呢。。。此時此刻，諗起周星馳響國產凌凌漆，拎起隻鞋嚟吹頭。。。