每次來日本，無論行程多緊密，都會抽一兩天去溫泉旅館。我並唔係專業買手，唔駛放假都馬不停蹄飯都唔食由朝shop到晚，攪到自己身心疲累仲慘過平日番工。去溫泉就係最佳的停一停，鬆一鬆，差完電再番東京喪玩喪買。浸溫泉還是其次，旅館提供的兩餐才是真正令人趨之若䳱，回味無窮。
今次揀了伊豆的修善寺。由於修善寺在伊豆半島的北端，離東京搭火車只是個半到兩個鐘。踊り子（Odoriko)號列車由東京直達修善寺，需時兩個鐘，可惜班次閒日很局限。另一個選擇是從東京搭新龫線ひかり(Hikari)到三島，再轉乘伊豆箱根鐵道駿豆線。此線來往修善寺與三島站。這方法雖然要轉車，但係只需個半鐘，比直行還要快。
我地由東京站搭十二點的踊り子。先在東京車站吃個輕便午餐，選了站內的「日本食堂」。此店專門提供牛肉洋食，內部裝修像極西伯利亞火車車卡。雖說是快餐，我點的hamburg steak卻質素其佳，肉汁滿瀉，佢地嘅特製醬汁濃得嚟味道又啱啱好，不會過咸，真係要俾個like佢！
東京站內的菓子手信鋪琳琅滿目，有D仲有得試食。我地買左啫喱和杏仁豆腐做飯後甜品，外帶在車上吃。嘩，看看外帶還有個精緻的專用膠盒，真係不得不寫個服字俾日本人。
由修善寺駅到修善寺溫泉區可乘巴士或的士。所有景點在溫泉區內徒步可達。地圖也有推介步行路線。特別留意這裏有梅花林，每年二月中旬到三月中旬是開花季節，還會有梅花祭。
以下介紹幾個值得去嘅景點：
（1）修善寺
修善寺門口有個喝水池，好多日本寺廟都有，不足為奇。妙就妙在水居然是暖的，在冬天還冒著白煙。
寺裏面還有舊刻了惡死人面嘅大石頭。
（2）独鈷の湯
由於修善寺是溫泉鄉，溫泉處處。在這裏有個「独鈷の湯」，是修善寺温泉區的象徵，係一個公眾足浴池。冬天到此浸一浸，傾下偈，食番個軟雪糕，所有腳部疲勞即刻一掃而空，有効過腳底按摩。
（3）竹林
這裡有一大片高嵸的竹林，走在其中，慢慢散步，一邊聽著旁邊的淙淙溪水聲，呼吸著香港難得一聞嘅清新空氣，真係舒服到不得了。
其實溫泉鄉不大，慢慢行個零兩個鐘可以走一圈，由於這裡有一條大河貫穿，溫泉鄉夾河兩邊而建，四週環境已經靚得沒話說。隨處還可見一些售賣日本傳統陶藝的小店。由於大多數都是上百年的古舊建築，一下子好似回到日本古時，與繁華先進的東京完全迴異。一月淡季，遊人稀少，更能享受大自然的一刻寧靜，一齊嚟洗滌一下心靈。
留言列表
