閑來無事，瀏覧Open Rice已經成為例行公事。無意中俾我發現這間Liberty Private Works，獲得很多食家極力推介，加上以八道菜800蚊食足三個半鐘確實合理，即刻急不及待去佢地網頁𥄫𥄫。
預約可以透過佢地網頁嘅online booking。佢地接受一個月前嘅預訂，不過據講你今日book一個月後都有機會waiting，可見其受歡迎程度。因為我一心要試，就求其有位就擸，結果居然俾我訂到個多禮拜後嘅星期五。這裏只提供7：30和8：30兩輪預約。
餐廳位於史丹利街11號嘅頂樓，在陸羽對面，上26樓要搭專用貨𨋢。餐廳不是很大，但樓底極高，三面落地玻璃，中環景致盡收眼底。餐廳中央是open kitchen，座位是圍著中央廚房的高身吧櫈，上落有點不方便。這個setting的賣點是讓食客全程能夠觀賞食物食嘅製作過程，但同時缺點係每道菜之間嘅等候時間比較長了點。佢地每個菜色嘅擺位都美麗精巧如藝術品一樣，睇住廚師逐少逐少地將各式各樣嘅食材慢慢鋪排在碟上，簡直係一個絶妙嘅視覺享受，儼如一場精釆嘅美食live show。順帶一提，由於我應該係最遲book的客人，所以被安排在側面近爐頭的位置，正如網友所言比較熱了點，但個人認為還可接受。如想要較佳位置，就必須早點訂位囉。
主廚很後生的一個型人！
一坐下先送上今晚的餐牌，八道菜加餐前小吃和petit four，飲品和咖啡／茶另計。佢地也提供wine pairing。菜式沒有名字，只有每道菜的主要食材。據他們說，每兩個星期會換一道菜式，但係兩個signature dishes係永遠不變。
Amuse Bouche，意指令人味蕾興奮嘅開胃菜。今晚嘅開胃菜係一片釀有八爪魚吸盤的薄切啫喱。
第一道菜係signature dish1，吞拿魚。吞拿魚放響正中央用蘿蔔薄片圍著，像花芯一樣。上面放了海膽和金箔，花朵周圍是脆卜卜的米通粒，食落口感十足。最特別之處，係碟左右放了兩粒frozen fruit，左面是提子，右面是龍眼。供吃前吃後清味蕾之用。
第二道菜係龍蝦，蟹肉配以tapioca 和黑色tempura (我實在吃不出是甚麼）。雖然佢地每樣菜色也會講解一次，但係講英文又講得鬼咁快，加上掛住影相，有好多配料食材食左都唔清楚係乜黎。
接著係我覺得全晚最好睇唔好食的三文魚配以新鮮花瓣。切切實實是幅畫又似一個春天花園。可惜三文魚普通了點，反而值得一提是那個像蟲蟲的中式artichoke，口感很特別。
下一道係Signature Dish 2。餃子，流心蛋，truffle，似湯非湯。餃子包著流心蛋，食嘅時候把皮擋開，讓蛋汁四溢，混著旁邊的芝士一起吃，每啖都帶著濃濃黑松露香味。佢地仲奉上一個新鮮焗起嘅麵包，俾你點著汁一起吃。味道確是一流，唯美中不足是餃子皮有一點點硬，汁醬也有D D「漏」，容易給人飽肚的感覺。
跟住係今晚嘅兩道主菜，分別係雞同鹿肉，老實說相對地比其他菜式略嫌失色了，尤其味道無甚特別。以前在瑞士吃過小鹿Bambi肉，比這塊紅噹噹像是Sashimi的鹿肉塊好吃多了。幸好沒有血，就成塊當魚生放入口了。
好，甜品時候到了。估唔到這裏的甜品還是蠻有水準。甜品是兩個人share一個長長的碟，以士多埤梨為主題，卻新鮮地加了一個蕃茄和mochi，加添幾分創意。主廚然後為每個客人添加冒煙的急凍士多冰塊，裏面還夾雜著士多埤梨肉。驟眼看有些像文華Krug on the Moon的mini版。不過味道可說不相伯仲，俾三個讚！
第二道甜品是炒鮮奶+雪糕。平凡了點，但味道不錯。
最後的petit four是現場即焗的法式小蛋糕。我從來未見過餐廳咁有心有要求去對待食物，連小如last one的petit four也要即場焗製，務求讓食客吃到最新鮮最美味的。這種一絲不苟的態度確實讓人感動，猶其在香港這個利字當頭，樣樣講求効率和成本効益的地方。我好像在這裏看到日本人一樣的認真，法國人對美食嘅執著，還有享受人生的追求！
綜合而言，兩個signature dishes和甜品是整晚menu的亮點，絶對是水準之作。一千元樓下，能買這樣的享受，去欣賞真真正正對美食嘅熱誠，確實是超值！
留言列表
