Krug Room - 奇妙美食之旅－娜娜林部落格

我地一行十個人嚮十月五日去了Mandarin Oriental的Krug Room食Dinner。雖然價錢對於普通打工仔的我們簡直是嚇到擘大口得個窿嘅天價，但係本著人一世物一世嘅心態，還是決定試佢一試。

第一次認識Krug Room，是透過蘇民峰「食得峰騷」的節目。那一集介紹左D乜全無印象，唯獨當他介紹到Krug on the Moon的時候，就不其然吸引了我的目光，望著那九大恆星一樣的朱古力球鋪在長長的飯枱上，覺得好新奇，像藝術表演一樣。即刻心裏響起要試要試的聲音，於是幾經辛苦，先看到電視螢光幕上那幅牆上寫著「The Krug Room」的字樣，即刻去Open Rice來個大搜索。網友post的相片全都極度趣緻，並不是隨處可以吃到，急不及待call friend有冇興趣。原本諗住這麼貴，D friend一定灑手擰頭，點知一呼百應，大家都好踴躍期待參加這次美食約會。

Book Krug Room有幾個小貼士。

一、最早三個月之前預約，預約是要預先給他們信用卡資料。如果在預約前三天之內取消預約，是需要繳交罰款。

二、Krug Room是一間private room，最多只可容納十二位。假如你的人數是在七位或以上，基本上已經可以包房。

三、Krug Room 的menu大概會在預約的一個月前決定，酒店會通知客人，客人亦可預先告知酒店有什麼是不吃的。所有menu都跟 Krug Champagne，有三款不同選擇，價錢亦有所不同。

晚飯由八點開始，但他們要求客人七點半便到場，讓他們可以介紹一下Krug Room的歷史和環境。Krug Room是要經過另外一間餐廳進去的小小房間。房間有張長長的雲石枱，盡頭是刻有The Krug Room字樣和標誌的牆壁，牆和地板都是用酒桶的木改做而成。天花的碗碟砌成像河流倒影般的模樣，伴有新鮮的玫瑰花。一邊透過玻璃，可以望到廚房裏的一舉一動，聽說我們望到的偌大廚房都只是Serve我們Krug Room的。

Krug其實是指Krug Champagne。The Krug Room也是酒廠和酒店合作，全世界現在有三間，另外兩間在倫敦和Las Vegas。一入到The Krug Room，歡迎我哋就是一大枝Krug Champaigne。

全晚總共有十七道菜，係無錯，十七道。

一嚟就上三道。全部都是蚊蠅Size，像食陣風，吃了好像冇吃。長長的那條，像蝦片多過似Beef。三樣裏面最好吃那個有Truffle的小方塊，因為夠濃味。

接着是Oyster，D石頭好像雪糕，但其實他們真係石頭，是唔食得的。最有趣係側邊嗰兩塊葉，係有蠔味㗎！

第五道菜，名叫Tinned，整到好似罐頭咁，裏面有幾條Hamachi魚肉條，味道卻一般。

這個Heirloom Beets有紅菜頭，白色嗰塊好似話係Goat cheese整到好似乳酪片，因為會黏牙，所以要切開同其他一齊吃。

King Crab好細舊，兩邊有D好似豆腐的東西，蟹肉夾在中間，都幾好味。食到這裏，朋友們開始擔心吃不飽，起哄說吃完這餐還要到翠華消夜。點知好戲在後頭。

Sea是全晚最令我失望的，那舊魚有渣的，還有下面的石頭攪到我都唔知點切舊魚，唯有成舊吞下去。

Consommé 其實是個蕃茄湯，卻用杯上像喝下午茶一樣。中間是舊冰塊，喝完冰塊都仲未溶掉唯有放棄佢

我最喜歡接著這個Pea，用幾種不同煮法的豆，盡顯廚師的心思，味道也極好。

White四十度水唔知Slow cook左幾多分鐘嘅魚，單是賣相已經攞滿分。Like!

龍蝦好好味，不過都係嗰句，細舊左D囉。最特別係下面嗰塊木，一路會散發著木炭香，可見廚師除左顧及視覺和味覺之外，還會注意埋嗅覺上嘅享受！不得不寫個服字。

第十三道菜係乳豬，這笨唔係一隻普通豬，係來自威爾斯幾個星期大的BB豬。有種入口即溶的感覺，來到這裏開始有D伙頭智多星嗰種食到會飛天嘅感覺。

哈！當大家對BB豬讚不絶口嘅時候，點知第十四道牛肉就出事了。這道菜先上一個黑忟忟的碟，聽講黑色是由茄子磨成粉再塗上碟，那舊黑炭是木薯來。然後才上牛肉再上配汁。開動吃了！席上開始有人說那木薯好咸，然後有兩個朋友說連牛肉也超咸。由於我那塊OK，所以大家一窩風去試食朋友的咸牛，公投一下是否真的咸到頂唔順。結果一致認為咸到標眼涙。朋友決定投訴，可是Krug Room的廚師已下班（？？我地仲未食完就放左工？？）擾嚷一輪結果叫左Mandarin Room Service的廚師為兩個朋友再煮過兩塊肉眼扒，朋友們也終於收貨。