對日本的燒雞飯有份難以解釋的情意結，真係好令人懷念。以前響東京做嘢嘅時候，成日去公司對面嘅燒雞舖食Lunch。那間鋪頭好有性格，Menu只有三樣嘢，1）Chicken in a box; 2) Chicken outside of a box; 3) 親子丼，啱哂有選擇困難的你（當然要揀D雞響唔響個盒入面都幾花心思㗎！）最記得個老闆仲無啦啦放咗一年假，到我差唔多要離開東京嘅時候先返嚟開番舖，有性格到呢。。
所以，今次朋友極力推介這間響築地嘅燒雞飯店，仲要講到係全東京最好食，仲唔第二日即刻仆倒去食咩。仲要空肚食早餐個隻，唔係點試到D真雞味。餐廳就位於晴海通，沿著晴海通由銀座往築地方向大概行十分鐘就見到，途經築地市場，你要有信心唔會改變主意去左食魚生先得，因為我哋意志好堅決所以輕易過關，直闖雞店。
因為時間尚早，未到午飯時間，裡面冇其他人客。裝修非常之咁簡約，仲俾我見到這個逐頁揭式日曆，好經典呀！
先look look餐牌。真係蠱惑的餐牌，其實三款都係同一樣嘅嘢（就係燒雞胸肉，同免治雞串），只不過係數量唔同，價錢又爭少少。左面那個燒鳥丼仲加多個雞籮柚咁重口味。。 我一早已經收到風，最抵食嘅係右面嘅Service丼，有三舊雞胸肉同兩條雞串，只係1050円，加埋有湯送，係咪好抵先？
嚟啦嚟啦。。我的Service丼！ 醬汁同山椒粉是自己後加的。個雞好。。好。。。好食呀！好肯定係新鮮雞，因為雞有雞味，而且好彈牙好Juicy。。。 WoW。。 第一舊最好食，至於個雞串，本人覺得好好味 （可能我鍾意食免治嘢！）不過朋友話都係雞胸好食啲， OK，各自各精彩啦！唔識形容，總之真心覺得好食，俾兩隻拇指公佢！而且比起赤阪公司對面個間有過之而無不及，舊那間醬汁比較濃而且雞較細舊，這裡雞肉大大舊，少醬汁更能突顯雞的鮮味。
一句講晒，早餐一流。食完行番去銀座，十一點啱啱百貨公司開門，fit哂！
Totoya とゝや （ととや） （注：只供午市 星期一至六9：00 － 14：00）
東京都中央区築地6-21-1
03-3541-8294
留言列表
