以為試菜是殿堂食家的專利,小妹今天有幸來到位於蘭桂坊加州大廈23樓的Townhouse試菜,當真與有榮焉,為了不負所望,我真的要更加俾心機去寫這篇食評先得。
首先先參觀下四周環境,頂樓位置景就梗係預咗無敵架啦。。。 仲要三邊落地玻璃窗加上極高樓底,簡直冇得輸!如果夜晚嚟應該更加正。
落地大窗,中環IFC就在眼前
這裡採取現在很流行的Open Kitchen格局,一路食嘢一路可以欣賞廚師手勢。
酒吧外更設有一個小小的室外空間,飲嘢吹水(打邊爐)一流!
有個咁大嘅水吧,自然有很多自製特色飲品供選擇。今日試菜就有機會試了其中四款。
左面嘅係洛神花加紫蘇葉冰茶,右邊呢就係芒果玫瑰花茶。本人比較喜愛洛神花茶,冇咁甜。不過兩者都很消暑,炎炎夏日解渴一流。
喜歡酒精的不妨試下佢哋嘅Cocktail,賣相好得!我特別喜歡這款名為『Welcome to the Town』的,裡面放咗乾冰,一路上枱啲煙係咁流出嚟,唔飲得都睇得啦
還有這個『First Night』,上面嗰片西柚仲特登grill過,真係不得不佩服佢哋嘅心思。
同佢哋嘅姊妹店Glasshouse一樣,餐牌都分開Small Bites,Large Bites,Main Bites等等。。
先上嘅係Small Bites裡面嘅照燒雞肉串,碟未上已經聞到濃濃肉香,嗰浸香味唔係講笑真係令人流晒口水。水準之高,同日本料亭真係有得揮!
然後係炸鵪鶉,加埋青檸汁同淮鹽yummy
不過講到特色,就唔及以下呢個貌似蒸蛋嘅薯蓉,嘩!唔食落口真係唔知係薯蓉,入口Creamy到呢。。。 可以選擇Classic或者加入鹹魚粒,我覺得加鹹魚粒鹹鹹哋仲好味!
跟住係避風塘炒軟殼蟹,最有趣是炒埋脆脆片,甜甜地辣辣地好搞鬼。
我個人覺得以下呢個Pizza,是全日最驚喜的,唔好俾佢Pizza嘅外表呃到你,其實食落佢係徹頭徹尾嘅北京填鴨shocked 真係估佢唔到!
好啦,甜品時間。真係不得不佩服這裡嘅廚師,唔單止主菜做得出色,就連甜品也落過苦工。
我至愛這個Wasabi味嘅朱古力慕絲,Wasabi同朱古力出奇地夾,食落少少辣少少咸好得意,旁邊嘅Lime Sorbet都不失禮,同朱古力Mousse一齊食絕配!成個甜品好有誠意,真係好好食!聽講廚師特登響某個位置會放多D Wasabi,好似辣辣壽司咁嚇你一跳。。 不過我食勻成個Mousse,都搵唔到這個辣辣位,有少少失望囉!
OK,Showtime,另一驚喜就係呢個雞蛋仔火鍋,雞蛋仔做甜品,我都係第一次食咋!將雞蛋仔放入去熱辣辣吉士醬,再加埋棉花糖,Oreo碎同雜莓。。。 真係要俾個讚佢!我覺得不妨考慮下改做Dark Chocolate醬可能效果仲正!
這裡食物環境絕對係水準以上,真心推介俾中環返工嘅你!
留言列表