娜娜林部落格

大家知唔知道有一個世界五十最好餐廳排名架呢？

http://www.theworlds50best.com/list/1-50-winners

當然，參考下姐，唔係叫你『跟住個list去旅行』，我邊會咁娘先（下刪笑聲三十下）。。 我食Narisawa都唔係因為佢係第八位（真係唔係，除非係），而係因為食家陳生介紹。當然，跟排名又好friend介紹都好，總不免有中伏嘅時候。只嘆一句，要食好（東）西難免要啲運氣仔架啦。

其實寫Narisawa之前，諗咗好耐個標題，應該寫佢個魔法麵包丫定係寫overall個觀感好呢。。不過無論點好，我都係決定先介紹佢個麵包。後來睇番，先知原來個小小麵包係餐廳嘅standout dish。Well，真係好standout囉，真係可以講足一世咁難忘。我成日話（我話咋！），要睇一間西餐廳好唔好食，睇下個餐前麵包質素就略知一二。如果用呢個標準，咁Narisawa一定贏到開巷，直情係走響麵包界嘅尖啄，擰轉頭見唔到任何人果隻！

不過嚴格來講，個麵包（人家有名嘅，叫Bread of the Forest 2010)並唔係餐前，雖然佢響個餐牌係排最前。你睇下佢哋個餐牌整到好似個書籤咁，專登俾客人最後可以帶走慢慢返屋企研究。

一嚟上菜，就係從第二味開始。心都有啲奇怪，個『森林麵包』去咗邊呢。不過掛住影相同欣賞啲食物都唔得閒諗咁多。食到咁上下，無啦啦侍應就捧咗碟咁嘅嘢上枱。

我先望下中間果pat好似史力加嘅漿，心諗咁核突嘅唔係食吓話。。  唔通係食側跟啲生果（講笑姐，爛gag嚟嘅！），侍應只係話呢個係yeast (酵母）嚟，叫我哋唔好搞佢，由佢放响度發酵下。哦（？）

再過十零分鐘，侍應又返黎啦，今次推咗架車仔出嚟，個賣相同頭先碟嘢係一個theme架，好森林呀！然後二話不說，將果pat史力加撻落去花叢裡邊個兜兜度，然後施展魔法，沈咗D魔法粉 (咋。。咋。。 可惜冇煙冒出嚟。。。唔係效果更佳!)，炒咗一陣，用蓋一冚，上枱。。。 未食得。侍應話繼續等。。。 哦。。。 我諗我形容得唔係咁好，自己睇片。。去片！

如是者，過多十零分鐘之後，侍應終於返黎打開。真係好似表演魔術，最後由頂帽走出嚟果隻兔仔一樣。不過今次笨唔係兔仔，係兩隻麵包！響呢個moment，真係點唔可以唔O嘴。。。

為咗配合森林嘅意境，仲要加多舊小草牛油響側邊。冇錯，係牛油嚟架。。。 真係暈低咗。

搞咁多花臣，你一定會問，咁好唔好食先。Good Question！答案係，真係真係真係超超超好食。同平時用焗爐焗嘅麵包係完全唔同層次（我知，因為食完呢個魔法麵包，佢哋仲會補多個廚房焗爐焗嘅同款兄弟麵包比我哋refill）。首先熱到無朋友，真係辣嘴！其次係麵包裡面有柚子，淡淡嘅柚子清香配合新鮮無比嘅麵包真係令人有如騰雲駕霧。。。 （後刪三百字。。） 個牛油雖為配角都不得之了，上面綠色海苔碎粉末，下面啡色朱古力粉，連埋啲牛油搽落去麵包度真係絕配，好好食呀！（我哋隔離枱嗰班外國人，仲一啖吔咗成舊牛油，真係不得不佩服佢哋唔怕肥嘅膽量！）可惜新鮮魔法整嘅只有一千零一隻，食完就冇lu。一絕。。難忘。。 ！ 絕對係成個餐牌裡面至好食嘅招牌菜！

待續。。。