十月準備京都之旅嘅時候，心血來潮醒起阿蘇『京都SO GOOD』介紹過食朝粥，於是就拎起電話打去飄亭訂位 （點解我咁叻會知間嘢叫飄亭呢？因為麻生圭子響『小巧京都食導覽』都有寫過）。 阿蘇介紹得嘅當然非一般餐廳，飄亭是擁有三粒米星星嘅懷石料亭，最特別係佢會提供早餐。阿蘇食嘅係飄亭本店，而我哋因為係十一月嘅關係，所以只可以在別館食。兩者有乜嘢分別呢？阿蘇果個係6000円（嘩，仲要係十算六舊水），我哋食別館只需要4500円。除此之外，本店有古色古香個室坐地蓆，別館則是有枱有櫈但係冇個室。不過唔駛煩惱，因為係冇得你揀嘅，本店只在夏天七八兩個月先會開放食朝粥，而且只有八至十點兩個小時，認真巴閉，其餘月份則只有別館提供，之不過十二月到三月中係無論本店別館都係冇早餐吃嘅要留意啦。
飄亭位於南禪寺附近，地方有一點隔涉，到訪當日仲要氣溫驟降冬意濃。一入門口有條長長走廊，訂咗位都要在這條走廊等候。等等下發現條龍越等越長。。 訂咗位都要等等等。。可能佢哋覺得我哋個樣未夠肚餓，所以要響走廊食下西北風先。驟眼望去，大部分都是日本人，咁又係香港人應該唔係咁多個好似我咁會有興趣千里迢迢嚟京都俾幾百蚊食粥卦哈哈。
話時話點解我會想吃朝粥架呢？因為俾這個葫蘆身形嘅三層瓷器吸引，似唔似俄羅斯娃娃呢？當然好多人話個流心蛋先係一絕。十一月仲醒你兩舊京都特產鯖壽司 （中間紅噹噹嗰兩舊，都係睇圭子小姐『京都小巧生活』學返嚟嘅，嗱，雖然我少文化睇書少，但係旅遊書我可是真係有用心『研究』㗎！）
睇下個葫蘆賣乜藥先。。登登登。。第一層，菜！
第二層，蒸蛋 + 魚 + 海藻。
第三層，蒸蔬菜。
到主角出場啦，同阿蘇食果個唔同，我哋個粥唔係白粥嚟，有菜同埋肉碎，感覺有D似潮州粥嗰隻水還水飯還飯，都幾好味。
仲有麵豉湯送。呢個麵豉湯超好飲。順帶一提，佢哋嘅茶都好好味道。
總體感覺如何呢？阿蘇最尾講得好，D嘢係咪自己最鍾意食唔緊要，要當係一個體驗，唔係點同人講去過京都先。Very well said! 有機會下次要試埋佢哋個正餐。
瓢亭 本店 （ひょうてい）
京都府京都市左京区南禅寺草川町35
075-771-4116
留言列表
