娜娜林部落格

當年托酒店的推介，發現了東京今半壽喜燒，即刻驚為天人。其實背後係有段古的。話說原本我係拜託酒店幫我book位於New Otani酒店嘅『岡半』（記住東京有兩間岡半壽喜燒，係New Otani嗰間，唔係銀座果間），只可惜兩日前預訂都已經fullu fullu了，先『退而求其次』食了今半。

如是者吃了好幾次今半（亦介紹了好幾個朋友仔去食過），今次再訪東京，決定要俾岡半多一次機會。我自己一個月之前打電話親自去訂Lunch，完全無難度。再睇下佢哋網頁個價錢，咪住先，有問題。。 點解晏晝食壽喜燒午市套餐，只係三千五百日圓。。。 ？？？ 咁。。。平嘅？？？  究竟食乜牛先？加上又咁容易book，心裡難免懷疑究竟好唔好食架，仲一度有取消預約番去食今半嘅念頭。。。 不過諗住費事煩，姑且一試嘅心態，於是就響一個風和日麗，藍天白雲，櫻花盛開嘅下午，走出咗赤阪見附地鐵站，步行去New Otani酒店。去過東京咁多次，都係第一次去New Otani酒店，真係超大。。。  單係由行入New Otani辦公大樓，再行去酒店大堂，再行去餐廳，就起碼需要10分鐘。。。我都係第一次響東京見到咁大嘅酒店。。（係，我認我大鄉里）

我哋book咗十二點正，點知成間房只係得我哋一張枱有客，好似包場一樣，到我哋差唔多走先嚟多兩枱客人。嗱，食壽喜燒如果係由專人幫你燒嘅話呢，係應該由頭到尾都係由同一位侍應招呼你嘅，唔知係咪因為客人唔多，我感覺我哋今次位侍應好似淨係serve我哋一張枱咁。。  （點解我要特別提呢個專人服侍嘅point呢，因為要計算埋入去如果我哋只係俾3500日圓食午市套餐個性價比呀嘛，你知東京人工幾貴㗎啦！）

講番個3500日圓午市套餐係咁嘅。我哋當然要打爛沙盤問到篤，了解一下咁嘅價錢，岡半俾啲乜嘢牛我食啦。。  有問題，有答案。。  原來係A4和牛，仲要係雪花均勻嗰隻。親身食過真係好滑好得好食，唔係講笑。

既然一場黎到，加上本著求真嘅心，梗係要再食啲靚啲嘅牛牛，比較下究竟3500円套餐係咪真係咁抵食。於是我哋再嗌多個12000円套餐，今次係A4同A5牛一半一半。

嗱，老實講，A5牛呢的確係滑過A4牛個小馬鼻，但係個人認為值唔值嗰八九千円差價呢就好見仁見智，咁呢當然貴嘅餐嘅餐後甜品係清甜蜜瓜，3500円就只有綠茶雪糕一杯，不過呢啲都係虛名嘢嚟嘅啫，重點都係牛牛呀嘛。3500円食到咁嘅質素嘅A4牛，講真真係唔知去邊度搵，仲要係響高級酒店入面，專人服侍。。。

通常呢，食壽喜燒都會跟飯一齊送牛肉食嘅，但係呢如果你唔係好大食，我就強烈建議你飯最後先上，放在壽喜燒啲汁度一齊煮，叫侍應加埋蛋同蔥。。。 唔。。。 好味道呢。。。

真係冇得頂。。 如果單從性價比去計，岡半實在無論食物質素，餐廳環境以至服務態度都大大跑贏咗今半（注：今本已經各方面都超班架啦，不過真係一山還有一山高，冇辦法）。實在太抵食啦，十個讚！最重要係，家陣咁多日本餐廳都拒絕外國人直接預約，岡半還是很樂意接待外國人，真係好難得。下一次，等我試埋東京tabelog壽喜燒第一位嘅末広町いし橋，就真係可以為呢場壽喜燒之爭嚟個終極一併啦！！！

岡半

東京都千代田区紀尾井町4-1 ホテルニューオータニ 東京 ロビィ階

03-3261-3417

http://www.newotani.co.jp/tokyo/restaurant/index.html

之前今半的介紹

http://harmomimi.pixnet.net/blog/post/284526257